Эксперт сезонлы террасаларның ролен аңлатты.
Җылыту белән шәһәрләрдә җәйге кафелар һәм верандалар ачыла. Казан федераль университетының дизайн һәм мохит сәнгате институтының (ИДиПИ) архитектура һәм медиасәнгать кафедрасы мөдире Степан Новиков үтеп баручыларның уңайлылыгы белән ничек баланс табарга һәм террасалар урамнарны кабул итүне үзгәртәме икәнен аңлатты.
Сезонлы мәйданчыклар барлыкка килгәндә күзгә ташлана торган беренче нәрсә – гадәти шәһәр пейзажының трансформациясе.
«Җәйге террасалар барлыкка килү шәһәрнең тышкы күренешенә уңай йогынты ясый, бигрәк тә алар дизайнерлык буенча уйланылган булса», – дип шәрехләде белгеч.
Теләсә кайсы шәһәр өчен иң авыр мәсьәлә – җәйге конструкцияләр аркасында үтү юлларының тараюы. Уңышсыз урнашкан терраса үтеп баручылар өчен генә түгел, кунакларның үзләре өчен дә уңайсызлык тудыра.
“Алар җәяүлеләр юлын капларга тиеш түгел. Кафе я киң тротуарда, я зур булмаган мәйданнарда урнаша ала. Әмма дөрес итеп рәсмиләштерсәң, чәчәк тумбалары яисә ширмалар белән әйләндереп алсаң, мондый зоналарны тар урамнарда да урнаштырырга мөмкин, бигрәк тә алар шәһәр үзәгендә, җәяүлеләр өчен зур трафик зонасында урнашкан булса. Бу уникаль шарм тудырачак”, – дип ассызыклады Степан Новиков.
Җәйге верандалар бигрәк тә шәһәр кызган бетон джунглига әверелә торган эссе көннәрдә кулланыла.
“Мин ачык террасалы зоналарда махсус микроклимат булдырыла дип әйтер идем. Анда үзгә тавыш, ис. Әгәр кирәк булса, салкын булганда вентиляторларны яки газ горелкаларын кабызалар. Алар салкын эчемлекләр белән кояштан ышыкланырга яки, киресенчә, яңгырдан качып, пледта чәй эчеп җылынырга мөмкин булган ниндидер оазисларга әвереләләр”, – дип йомгаклады кафедра мөдире.
Материалны өлешчә яки тулысынча күчереп бастырганда, шулай ук цитаталар китергәндә КФУ матбугат хезмәтенә сылтама ясарга кирәк.
Авторы: Әминә Морат, КФУның мәгълүмати сәясәт департаменты, фото: Арина Егорова