Казан федераль университетында илнең әйдәп баручы нефть химиясе компанияләренең берсенең заманча фәнни-мәгариф пространствосы ачылды.
Бүген тантаналы рәвештә Казан федераль университетының А.М. Бутлеров исемендәге Химия институты мәйданчыгында Сибур компаниясеннән химия юнәлешендәге интерактив фәнни-мәгариф пространствосы ачылды.
КФУның мөһим стратегик партнеры буларак, Сибур вуз белән хезмәттәшлекне үстерү һәм кадрлар резервын формалаштыру буенча озак сроклы стратегиясен дәвам итеп бренд-зона ачты. Биредә булачак белгечләр уңайлы шартларда профильле дисциплиналарны өйрәнә, предприятие эшчәнлеге һәм карьера мөмкинлекләре турында белә алачак.
Казан университеты ректоры Ленар Сафин сәламләү чыгышында партнерларга рәхмәт белдерде һәм Химия институты диварларында Сибурның бренд зонасын ачу тантаналы вакыйга гына түгел, ә КФУ галимнәренең идеяләре илнең алдынгы сәнәгать компанияләренең берсенең практик таләпләре белән очрашкан бер вакытта «фән — мәгариф — индустрия» бәйләнешенең ничек нәтиҗәле эшләргә тиешлегенең якты символы булуын билгеләп үтте.
“СИБУР – безнең стратегик партнер. Без бергәләп яңа материалларның һәм нефть химиясенең киләчәген билгели торган проектларны гамәлгә ашырабыз. Университет өчен мондый партнерлык бәһасез. Ә безнең студентлар һәм аспирантлар өчен ул алар иң заманча технологияләрдән файдалана һәм тармакның реаль бурычларын хәл итә дигәнне аңлата. Ышанам ки, бу заманча һәм уңайлы пространство талантлы яшьләрне җәлеп итү нокталарының берсе булачак, алар фән үсешенә һәм партнерлар белән нәтиҗәле хезмәттәшлегебезне ныгытуга үз өлешләрен кертәчәк», – диде КФУ ректоры.
СИБУР Инновации генераль директоры Илназ Зарипов үз чиратында студентлар һәм галимнәрнең үзара хезмәттәшлеге фән һәм сәнәгать үсеше өчен яңа офыклар ача дип ассызыклады.
“Студентлар реаль тикшеренү бурычларына кагылу һәм технологик чишелешләрнең ничек тууын күрү мөмкинлеге ала, ә галимнәр — яңа буынның яңача карашун күрә һәм энергиясен тоя ала. Университетлар белән партнерлык — булачак кадрларны формалаштыруда һәм тармакны үстерүдә мөһим элемент».
Шулай ук ул хәбәр иткәнчә, СИБУР һәм КФУ махсуслаштырылган магистратура булдыру мөмкинлеге турында фикер алышалар. Әлеге проект булачак белгечләргә гетероген катализ өлкәсендә теоретик белемнәр алырга һәм Казандагы СИБУР Инновации фәнни-тикшеренү үзәге базасында гамәли күнекмәләр алырга мөмкинлек бирәчәк.
«Казаньоргсинтез» ның оештыру үсеше буенча директоры Юлия Меречина да бүген базар мәсьәләләре һәм квалификацияле кадрларга кытлык дәрәҗәсе турында сөйләде.
“Уку йортлары белән эшләү — безнең озак вакытлы стратегиябез. Яңа белем бирү киңлекләре безгә яшь буын өчен якынрак һәм аңлаешлырак булырга ярдәм итә, студентларга безнең ничек итеп үсеш өчен потенциаль партнер булуыбыз турында тулы картина бирә. Казан – җитештерү, фән һәм экспертиза берләшкән уникаль мәйданчык. Шуңа күрә республиканың әйдәп баручы югары уку йорты белән партнерлык төзү — мантыйкый һәм мөһим адым. Быел гына да КФУның 30га якын студенты безнең мәйданчыкларда практика үтте. Без бу санның үсүен, ә нефть – газ химиясе талантлы яшьләр өчен таныш һәм карьера төзү өчен кызыктыргыч тармакка әверелүен максат итеп куябыз», – диде ул.
Гомумән алганда, Сибур һәм КФУ хезмәттәшлеге тирән фәнни-мәгариф нигезенә ия. Партнерлар гетероген катализ өлкәсендә уртак проектларны бер лабораториядә эшлиләр.
Химия институтында яңа бренд-зона исә “Фән һәм технологияләр дөньясына чуму идеясе тирәсендә төзелгән”. Аның территориясендә фәнни мәкаләләргә, китапларга һәм белешмә материалларга керү мөмкинлеге бирә торган электрон китапханәле интерактив киоск урнаштырылган. Мәгълүмат стенды Казан предприятиесенең актуаль проектлары турында хәбәр итә. Моннан тыш, пространствода профильле әдәбият җыелмасы булган офлайн-китапханә һәм ял итү, уку һәм команда эше өчен йомшак җиһазлы уңайлы ял зонасы ачылган. Бренд-зонаның үзенчәлеге булып «Көзгедә Менделеев белән очрашу» цифрлы экспонаты тора — бу тавыш идарәсе һәм танылган химикның ИИ-аватары белән интерактив панель, ул сорауларга җавап бирә, компания яңалыклары турында сөйли һәм өйрәтү уеннары үткәрә.
Тантаналы ачылыштан соң институт студентлары аудиториягә күчтеләр, анда Сибурның топ-менеджерлары һәм галимнәре белән очраштылар. «Галстуксыз сөйләшү» форматында студентлар үзләрен кызыксындырган сорауларны бирә һәм квалификацияле экспертлардан зур җаваплар ала алдылар. Башлыча инженерлык өлкәсендә эш перспективалары, инженер һөнәренең җәмгыять өчен файдасы һәм эшкә урнашу мөмкинлеге турында сораулар булды.
Авторы: КФУ ректоры Матбугат хезмәте, фото: Ксения Богданова