Казан университетының Җиззәхтәге филиалы базасында рус теле буенча тест үткәрү үзәген оештыру мөмкинлеге турында фикер алыштылар.
Казан федераль университетына җавап рәвешендә рәсми визит белән Үзбәкстан Республикасының Җиззәх өлкәсе хакимияте делегациясе килде.
Исегезгә төшерәбез, Җиззәх өлкәсе хакиме Олугбәк Мостафоев быелның апрелендә КФУ ректоры Ленар Сафин белән Үзбәкстанда очрашкан иде инде, анда югары уку йорты башлыгы эш визиты белән килгән иде.
Ул вакытта яклар Җиззәхтәге Казан университеты филиалының агымдагы эшчәнлеге һәм аны алга таба үстерү планнары турында фикер алыштылар. Аерым алганда, университетта чит ил гражданнары өчен рус теле укыту һәм тестлаштыру үзәген булдыруга игътибар бирелде.
Бүгенге очрашу ирешелгән килешүләрнең дәвамы булды. Мондый кирәкле үзәкне эшләтеп җибәрүгә кагылышлы юридик һәм оештыру мәсьәләләре буенча фикер алышынды. Сүз уңаеннан, хакимияттан тыш, идея шулай ук Үзбәкстан Республикасының Министрлар Кабинеты каршындагы миграция агентлыгы җитәкчелеге тарафыннан да хупланды, бу әлеге уртак проектның мөһимлеген тагын бер кат ассызыклый.
Үзбәкстан гражданнарының Россия предприятиеләрендә эшкә урнашуга зур кызыксыну белдерүе исәпкә алына. Хезмәт мигрантларының күбесе Идел буе федераль округына һәм Татарстан Республикасына эшкә килә. Эшкә хокук алу өчен, алар чит тел буларак рус теле, Россия тарихы һәм Россия Федерациясе законнары нигезләре буенча имтихан тапшыралар.
Хәзерге вакытта Казан университеты бу имтиханнарны Казанда, Алабугада һәм Чаллыда үткәрә. 2024 елда КФУ үзәкләрендә эшкә яки патентка рөхсәт алу өчен 4,5 мең, ә быелның ике аенда – 3,5 меңнән артык кеше тест үткән. Үзбәкстан Республикасы территориясендә кирәкле имтиханнарны тапшыру мөмкинлеге логистиканы шактый җиңеләйтәчәк, Россия тест үзәкләреннән йөкләнешне киметәчәк һәм миграция процессларын яхшырак контрольдә тотарга мөмкинлек бирәчәк.
Авторы: КФУ ректоры матбугат хезмәте, фото: Тамара Молканова