Делегация составында барлыгы 36 унберенче сыйныф укучысы иде.
Gaudeamus Халыкара белем бирү холдингын тәкъдим итүче Җаек шәһәре (Казакъстан Республикасы) өлкән сыйныф укучыларының Казан федераль университетына танышу визиты булды. Укучылар өчен бик бай программа әзерләнгән иде.
Гомуми тәкъдим итүдә КФУ кабул итү комиссиясенең җаваплы сәркатибе Александр Бибик университетның тарихы, аның структурасы, фәнни мәктәпләр һәм студентлар алдында ачыла торган мөмкинлекләр турында сөйләде.
“Без киләсе елга кабул итү кагыйдәләре турында абитуриентларга хәбәр итеп, партнерлык мөнәсәбәтләрен хупларга омтылабыз, документларны ничек оптималь һәм дөрес тапшырырга, безнең шәхси кабинеттан ничек файдаланырга, шулай ук эчке кереш сынаулар процедурасын ничек үтәргә икәнен аңлатабыз. Гомумән алганда, безнең бурыч – аларны вуз һәм аның институтлары белән таныштыру», – диде А.Бибик.
Кунакларга Казан университеты турында фильм күрсәтелде, анда вуз эшчәнлегенең төп юнәлешләре, аның алдынгы институтлары, фәнни казанышлары һәм халыкара партнерлык программалары тәкъдим ителде.
КФУның Тышкы элемтәләр департаменты директоры урынбасары Фәрит Хәйдәров әйтүенчә, Казакъстан белем дәрәҗәсе югары булган абитуриентлар әзерли.
“Без бу очрашуда бүлешкән мәгълүмат мөһим роль уйный. Ул балаларга белем бирү учреждениесен дөрес сайларга ярдәм итәчәк», – дип сөйләде Ф.Хәйдәров.
Презентациядән соң кунаклар Казан университеты музейларында булдылар. Этнография музее укучыларны Россия халыкларының мәдәни төрлелеге, аерым алганда Идел буе халыклары, аларның гореф-гадәтләре, костюмнары, көнкүреш әйберләре һәм рухи мирасы белән таныштырды. А.А. Штукенберг исемендәге Геология музеенда кунаклар минералларның, файдалы казылмаларның һәм тау токымнарының сирәк үрнәкләрен күрделәр, Татарстанның геологик үзенчәлекләре турында белделәр.
Шулай ук кунаклар Психология һәм мәгариф институтында, Исәпләү математикасы һәм мәгълүмат технологияләре институтында, Фундаменталь медицина һәм биология институтында булдылар.
“КФУ белән хезмәттәшлекнең төп юнәлешләренә килгәндә, монда педагогика, фундаменталь фәннәр һәм медицина классик өлкәләр тәкъдим ителгән. Абитуриентлар төрле белем бирү программаларын сайлый, ниндидер бер өстенлекле юнәлешне аерып күрсәтергә ярамый, чөнки Казан федераль университеты – белгечлекләрнең киң спектрын тәкъдим итүче югары уку йорты. Үзара хезмәттәшлек булачак студентлар өчен танышу экскурсияләре оештырудан башлана. Моннан тыш, укучыларның күбесе төрле олимпиадаларда катнаша. Безнең холдинг Казахстан Республикасында мондый чаралар уздыру өчен мәйданчык булып тора.Олимпиадалар ярдәмендә балалар үзләренең әзерлек дәрәҗәсен бәяли, укырга керү өчен шанслары нинди булуын аңлый һәм кереш сынаулар форматы белән алдан ук таныша алалар», – диде Gaudeamus Халыкара белем бирү холдингы директоры урынбасары Вәгыйз Хөснетдинов.
Материалны өлешчә яки тулысынча күчереп бастырганда, шулай ук цитаталар китергәндә КФУның матбугат хезмәтенә сылтама булу шарт.
Авторы: Әминә Морат, КФУның мәгълүмати сәясәт департаменты, автор фотосы