19 июльдә филология фәннәре докторы, Татарстан Фәннәр академиясе академигы һәм университет тарихында декан булган беренче хатын – кыз Диләрә Тумашеваның тууына йөз ел тулды.
Казанның Яңа Татар зиратына Казан университеты тарихында деканнар арасында беренче хатын-кыз – Диләрә Тумашеваның туганнары, якыннары, укучылары һәм хезмәттәшләре җыелды. Чәчәкләр салуда Казан федераль университеты президенты Рияз Минзарипов, Филология һәм мәдәниятара багланышлар институты директоры Рәдиф Җамалетдинов катнашты.
Россия Федерациясенең атказанган фән эшлеклесе Диләрә Тумашева югары уку йортына нигез салынганнан бирле деканнар арасында беренче хатын-кыз гына түгел, татар филологиясе тарихында беренче хатын – кыз фән докторы да була. 19 июльдә аның тууына йөз ел тулды.
“Ул безнең республикада үзен Себер татарлары телен өйрәнүгә багышлаган иң зур галимә генә түгел, ә бу телнең дә татар теле булуын исбатлады, һәм аның зур казанышы шунда. Ул яшьләргә дөрес юнәлеш бирә иде. Студентларның аны яратуы һәм хөрмәт итүе очраклы чиксез иде», – дип белдерде Рияз Минзарипов.
Рәдиф Җамалетдинов әйтүенчә, Д.Тумашеваның университет тормышына керткән өлеше – ул фәнни казанышлар гына түгел, ә факультет традицияләрен саклау һәм тапшыру да.
“Диләрә Гариф кызы тарих-филология факультетын җитәкли иде. Шуңа күрә без, гомумән алганда, бөтен институт аның эшен дәвам иттерүчеләр, дип әйтә алабыз, чөнки, ул еллардагы кебек үк, бүген без рус теле һәм әдәбияты, татар теле һәм әдәбияты, шулай ук чит ил филологиясе юнәлешләре буенча белгеч-филологлар әзерлибез. Әлбәттә, нәкъ менә Диләрә Гариф кызы Тумашева вакытында укыган һәм эшләгән укытучылар белән эшлибез”, – диде Р.Җамалетдинов.
Д.Тумашеваның Себер татарлары диалектларын тикшерүе тюрколог галимнәр тарафыннан фундаменталь хезмәт дип табылган. Лингвистның гаилә әгъзалары аның һәр җирдә хезмәт сөючәнлеген һәм эшкә тугрылык күрсәтүен искә төшерә. Алар әйтүенчә, бу, әлбәттә, аның балаларын һәм оныкларын тәрбияләүгә йогынты ясаган. Аларның күбесе соңыннан үз тормышларын Казан федераль университеты белән бәйли.
Материалны өлешчә яки тулысынча күчереп бастырганда, шулай ук цитаталар китергәндә КФУ матбугат хезмәтенә сылтама ясарга кирәк.
Авторы: Әминә Морат, КФУның мәгълүмати сәясәт департаменты, фото: Әхмәтҗон Оев