Аның проекты 800 мең сум грант откан.
Архангельскта яшь галимнәрнең «Полюс»Бөтенроссия форумы узды. Казан федераль университеты А.М. Бутлеров исемендәге Химия институтының беренче курс магистранты Павел Кокорин грантка тәкъдим ителгән гавами яклауда җиңүче булды. Аның «Мәгърифәт катализаторы» («Катализатор просвещения») проекты 800 мең сум күләмендә грант отты.
Форум турында егет уку чатларыннан белгән, укытучылар даими рәвештә конкурслар һәм чаралар турында мәгълүмат белән уртаклашалар.
«Мине шундук фәнне популярлаштыручылар өчен юнәлеш булуы җәлеп итте, ә табигыять фәннәрен, беренче чиратта химияне популярлаштыру белән мин инде берничә ел шөгыльләнәм. Моннан тыш, моңа кадәр минем бер тапкыр да форумнарга барганым юк иде, шуңа күрә үземне яңа форматта сынап карарга кызык булды», – дип сөйләде студент.
Павел Кокорин укуының беренче елларыннан ук туган вузы мәйданчыкларында, шул исәптән Химия институтының химия фестивалендә һәм “КФУда РROНаука” фәнни-популяр проекты сериясендә, муниципаль, республика һәм Бөтенроссия фестивальләрендә һәм бәйрәмнәрендә, шулай ук үзе химия укытучысы булып эшли торган 139 нчы гимназиядә фәнни чаралар һәм интерактив химик шоулар үткәрә. Вакытлар узу белән бу тәҗрибәне алга таба да тапшырырга кирәклеге аңлашыла.
«Мин студентларны, булачак химия укытучыларын, традиция университетта саклансын һәм аннан читкә чыксын өчен төрле чаралар үткәрергә өйрәтергә телим», – дип аңлатты ул.
“Мәгариф катализаторы ” – фәнне популярлаштыручылар мәктәбе. Проектта катнашучылар-КФУның Химия институтыннан 20 студент һәм Казанның биш мәктәбеннән 500 укучы.
“Башта балалар фәнни шоулар әзерләү һәм уздыру, аудитория белән эшләү һәм куркынычсызлык техникасы буенча дәресләр һәм мастер – класслар узачак. Аннары алар мәктәп укучылары янына чын чаралар белән чыгачак. Һәр мәктәпкә өч вакыйгадан торган цикл бирелә: мәктәптә фәнни шоу, Казан химия мәктәбе музеенда булу һәм “УНИКС”та “Научные штучки” интерактив күргәзмәсе. Нәтиҗәне бәяләү өчен без мәктәп укучыларының танып белү кызыксынуын белү өчен йомгаклау тестын үткәрәчәкбез”, – дип аңлатты яшь галим.
Проектның гамәли әһәмияте шунда ки, студентлар белем ала башлаганнан бирле зур зал каршында чыгыш ясау һәм балалар аудиториясе белән эшләү буенча реаль тәҗрибә ала. Мәктәп укучылары исә, шоуда бер тапкыр гына катнашып калмыйча, фәнгә системалы җәлеп ителә.
«Бу аеруча мөһим, чөнки тотрыклы танып белү кызыксынуы якынча 10-12 яшьтә формалаша, һәм нәкъ менә шул яшьтә балага фәннең мавыктыргыч булуын күрсәтергә кирәк», – дип ассызыклады П.Кокорин.
Проектка КФУның Яшьләр сәясәте Департаменты, «Знание» Россия җәмгыяте, ТР Студентлар лигасы, MILMAX фәнни-популяр лекторие һәм башка партнерлар ярдәм итә. Казан университеты Химия институтының химик белем бирү кафедрасы мөдире Сурия Гыйльманшина фәнни-методик консультант булып тора. Проектны гамәлгә ашыру 2027 елга планлаштырылган.
“Нәтиҗәләр буенча без интерактив фәнни чараларны оештыру һәм уздыру буенча зур методик кулланма әзерләячәкбез. Киләчәктә проектны муниципаль дәрәҗәдә үстерергә телибез, киләсе адым – мәктәп укучылары белән генә түгел, төрле яшьтәге балалар белән дә эшләү өчен төбәк дәрәҗәсенә чыгу һәм максатчан аудиторияне киңәйтү», – дип уртаклашты проект авторы.
Җиңү студент өчен күңелле көтелмәгәнчә булган.
“Минем грант иң зуры булып чыкты. Башта аңлау авыр булды, бу сиңа чыннан да кызыклы булганны тормышка ашырырга мөмкинлек биргәндә бик зур ышаныч. Мин бу проектны озак яздым һәм форумга нәкъ менә аны яклау һәм җиңү максаты белән бардым, шуңа күрә барысы да килеп чыгуына бик шатмын. Хәзер килешүне имзалауны көтәм һәм мөмкин кадәр тизрәк эшне башларга телим», – дип йомгаклады Павел.
Материалны өлешчә яки тулысынча күчереп бастырганда, шулай ук цитаталар китергәндә КФУ матбугат хезмәтенә сылтама ясарга кирәк.
Авторы: Әминә Морат, КФУның мәгълүмати сәясәт департаменты, фото: “Полюс” Яшь тикшеренүчеләр үзәгенең медиа бүлеге, басма героеның шәхси архивы