Экспертлар миграция законнарындагы үзгәрешләр, исәпкә кую тәртибе, «Паспорт-виза сервисы» ФДУП белән хезмәттәшлек һәм «Миграция учеты»АИС программасын кертү турында фикер алыштылар.
Бүген, 13 октябрьдә, Казан федераль университетында Татарстан Республикасы югары уку йортларында белем алучы чит ил укучыларының миграция мәсьәләләре буенча семинар узды. Семинар эшендә Татарстан Республикасы буенча Эчке эшләр министрлыгының Миграция мәсьәләләре идарәсе, «Россия Эчке эшләр министрлыгының паспорт-виза сервисы» ФДУП, КФУның Тышкы элемтәләр департаменты һәм республиканың башка югары уку йортлары вәкилләре катнашты.
Семинарны ачып, Казан федераль университетының тышкы элемтәләр буенча проректоры Тимирхан Алишев Татарстан Республикасының чит ил гражданнарын җәлеп итү буенча Россия Федерациясе лидерларының берсе булуын билгеләп үтте.
«Бүген дөньяның 100дән артык иленнән 20 мең чит ил студенты безнең республикада белем ала, бу Мәскәү һәм Санкт-Петербургтан кала өченче урын», – дип ассызыклады проректор.
Т.Алишев искәрткәнчә, ил җитәкчелеге 2030 елга 500 мең чит ил студенты күрсәткеченә ирешү бурычын куя.
“Безнең күпчелек университетларда чит ил студентлары белән шөгыльләнүче тиешле хезмәтләр бар. Үз вазыйфаи вәкаләтләре буенча чит ил гражданнарына ярдәм итә торган проректорлар бар. Күптән түгел генә бездә кабул итү кампаниясе узды, һәм без шул исәптән чит ил абитуриентларын да кабул иттек. Сентябрь ахырында соңгы боерыклар чыгарылды, һәм хәзер без үзебездә булган бакалавриат һәм магистратура программаларында чит ил студентларын кушып сөйләшә алабыз”, – диде ул.
Очрашуда хокук саклау блогы өчен җаваплы Татарстан Республикасы буенча Эчке эшләр министры урынбасары Денис Дзьоник чит ил студентларының яшәвен оештыруга аерым игътибар бирелүен билгеләп үтте.
“Югары уку йортларының куркынычсызлык хезмәтләре системасын контрольдә тоту җинаять һәм административ хокук бозуларны булдырмауга юнәлдерелгән. Кызганычка каршы, мондый фактлар бар, шуңа күрә бу безнең уртак игътибарыбызны таләп итә”, – диде министр урынбасары.
Ул шулай ук укытуга формаль якын килү проблемасына да игътибар итте.
“Башкача әйткәндә, чит ил гражданины, студент, күп вакытын укуга түгел, ә хезмәт эшчәнлегенә багышлый, тик формаль рәвештә генә дипломлы квалификацияле белгеч булып чыгачак. Кайбер очракларда белем алу нигезендә чит ил гражданнары, студентлар белем алу һ.б. максатлардан вакытлыча яшәүгә рөхсәт алырга хокуклы, ягъни билгеле бер дәрәҗәдә бу хокукый статусны легальләштерү”, – диде Д.Дзьоник.
Татарстан Республикасы буенча Эчке эшләр министрлыгы башлыгы урынбасары көн тәртибендә торган элементларның берсе – «Россия Эчке эшләр министрлыгының паспорт-виза сервисы»ФДУП белән хезмәттәшлекне оештыру, дип ачыклык кертте.
«Бу оешма миграция исәбенә кую һәм югары уку йортлары алдында торган башка бурычлар турында хәбәрнамәләр бирү тәртибен гадиләштерүгә юнәлдерелгән эшкә вәкаләтле», – дип аңлатты ул.
Татарстан Республикасы буенча Эчке эшләр министрлыгының Миграция мәсьәләләре идарәсе башлыгы Марат Галиев миграция законнарындагы үзгәрешләргә тукталды.
“Агымдагы елның 1 сентябреннән федераль законнарга медицина таныклыгы өлешендә үзгәрешләр кертелде. Моннан соң без чит ил гражданнарының ведомство эчендәге система аша электрон рәвештә медицина тикшерүе узуы турында мәгълүмат алабыз. Бу катгыйрак контроль алып барырга һәм, димәк, тәртип бозучыларга карата нәтиҗәле чаралар күрергә мөмкинлек бирәчәк. Шуңа күрә һәр чит ил студентына ел саен медицина тикшерүе узу бурычы булуын җиткерүегезне сорыйм”, – диде М.Галиев.
Ул шулай ук студентларга дәүләт программасында катнашу мөмкинлеге турында мәгълүмат бирергә өндәде.
“Көндезге формада белем алучы, кулларында РВП (Россиядә вакытлыча яшәүгә рөхсәт) булган чит ил студентлары күчеп килү буенча дәүләт программасында катнашырга хокуклы, бу аларның югары уку йортын тәмамлаганнан соң Россия Федерациясе территориясендә киләчәк хәлен гадиләштерә», – дип аңлатты идарә башлыгы.
«Россия ЭЭМның паспорт-виза сервисы» (ПВС) Федераль дәүләт унитар предприятиесенең Татарстан бүлекчәсе җитәкчесе Сергей Кубрак оешма тарафыннан эшләнгән платформа турында сөйләде.
«Безнең бүген сезнең белән миграцион исәпкә алу һәм миграцион законнарга бәйле беркадәр тар мәсьәлә булганлыктан, без „Миграцион исәпкә алу“ АИС платформасын эшләдек, дип әйтәсе килә, ул бүгенге көндә КФУ базасында сынап каралган», – диде ул.
Россия Эчке эшләр министрлыгының ПВС ФДУП бүлеге башлыгы Сергей Смирнов программаның миграция исәбен һәм виза чакыруын рәсмиләштерүдә ярдәм итүенә басым ясады.
Казан университетының ДВС директоры вазыйфаларын башкаручы Рамил Сәйфетдинов киңәшмәдә катнашучыларга рәхмәт белдерде.
«Ышанам ки, бүгенге очрашу безнең университетларны сайлаган чит ил гражданнары өчен уңайлы мохит булдыруга гамәли адым булачак һәм миграция законнарын үтәү өчен заманча цифрлы коралларны кертү процедураларын гадиләштерәчәк», – дип белдерде ул.
ДВСның чит ил хезмәткәрләрен миграцион теркәү бүлеге башлыгы Владимир Сурчилов системаны гамәлгә кертү тәҗрибәсе белән уртаклашты.
“Миграция исәбенә кую өчен хәбәрнамәләрне кәгазь чыганакларда йөртергә тырыштык һәм „Миграция исәбен алу“АИС ярдәмендә хәл ителгән билгеле бер проблемалар белән очраштык. КФУ-республикада бу системага тоташкан беренче югары уку йорты. Безнең фәнни кадрлар махсус әлеге программа буенча тулы бер техник бирем эшләделәр, аның ярдәмендә башка югары уку йортлары камилләштерелгән версиягә тоташа алачак”, – дип йомгаклады ул.
Материалны өлешчә яки тулысынча яңадан бастырганда, шулай ук цитаталар китергәндә КФУ матбугат хезмәтенә сылтама ясарга кирәк.
Авторы: Әминә Морат, КФУның мәгълүмати сәясәт департаменты, фото: Исламия Баянова