Республиканы Руслан Садретдинов тәкъдим итте.
Мәскәүдә Россия Мәгариф һәм фән министрлыгы каршындагы Укучылар Советының II съезды тәмамланды. Анда илнең 77 университетыннан студентлар катнашты.
Татарстанны Казан федераль университетының Студент фәнни түгәрәкләре ассоциациясе рәисе, Халыкара мөнәсәбәтләр институты студенты Руслан Садретдинов тәкъдим итте.
Съездда Укучылар Советы әгъзалары РФ Фән һәм югары белем министрлыгы вәкилләре белән очрашты, ачык диалог кысаларында актуаль проблемалар турында фикер алыштылар.
«Бу Укучылар Советы рәисен, президиумны һәм федераль округтан вәкилләрне сайлаганнан соң безнең беренче гомуми очрашуыбыз иде. Команда төзелде, кызыклы программа әзерләнде. Аның кысаларында стратегик сессия узды. Анда үсеш стратегиясе һәм максатлар билгеләнде, – дип хәбәр итте КФУ медиакоммуникацияләр үзәгенә Р.Садретдинов. – Очрашу нәтиҗәле булды. Ышанам, һәркем мөһим әйберләр, үз төбәгендә куллана алачак яшьләр сәясәте өлкәсендәге тәҗрибәләр турында белде”.
Съездның беренче көнендә бизнес-тренер һәм эшлекле коммуникацияләр өлкәсендә эксперт Алла Григорьева белән стратегик сессия булган. Сессия кысаларында спикер җитәкчелегендә катнашучылар команда эчендә үзара хезмәттәшлек принципларын билгеләделәр, инструментларны һәм аларны студентлар үзидарәсе органнары эшендә куллану вариантларын өйрәнделәр.
Съезд эшенең икенче көнендә оешма эшчәнлегенең норматив актлары һәм хокукый кыры; эчке һәм тышкы стейкхолдерлар белән үзара хезмәттәшлек форматы; уңышлы эшләү өчен кирәкле технологияләр турында фикер алыштылар. Шулай ук стратегик сессия кысаларында студентлар үз берләшмәләре эчендә киләчәктә гамәлгә ашырырылык конкрет чаралар, «юл картасы» турында да уйладылар.
Моннан тыш, Россия Мәгариф һәм фән министрлыгының Дәүләт яшьләр сәясәте һәм тәрбия эшчәнлеге департаменты директоры вазыйфаларын вакытлыча башкаручы Александр Ведехин белән очрашу булды. Ачык диалог формасы яшь лидерларга үзләрен кызыксындырган сорауларны бирергә һәм аларга киңәйтелгән җаваплар алырга, шулай ук аларның үзара хезмәттәшлеге форматларын билгеләргә мөмкинлек бирде.
Өченче көнгә ике көнлек интенсив эшкә йомгак ясалды. Съезд нәтиҗәле эшчәнлекнең яңа әйләнешен башлау өчен башлангыч нокта булды.
Автор: КФУның медиакоммуникацияләр үзәге, фото: студпроф